Write Comment     |     E-Mail To a Friend     |     Facebook     |     Twitter     |     Print

ಪುತ್ತೂರು (ಕುಂಬ್ರ): ಬೈಕ್‌ನಲ್ಲಿ ತೆರಳುತ್ತಿದ್ದ ವೇಳೆ ರಸ್ತೆಗೆ ಎಸೆಯಲ್ಪಟ್ಟ ವಿದ್ಯಾರ್ಥಿನಿಯೋರ್ವರ ಮೇಲೆ ಬಸ್‌ ಚಲಿಸಿದ ಪರಿಣಾಮ ಆಕೆ ಸ್ಥಳದಲ್ಲೇ ಸಾವನ್ನಪ್ಪಿದ ಘಟನೆ ನಗರದ ಬೊಳ್ವಾರಿನಲ್ಲಿ ಶನಿವಾರ ಸಂಭವಿಸಿದೆ.

ಕಾಸರಗೋಡು ಜಿಲ್ಲೆಯ ಪೆರಡಾಲ ತಲೆಕ್ಕ ನಿವಾಸಿ ಶಂಕರನಾರಾಯಣ ಭಟ್ಟ ಅವರ ಪುತ್ರಿ ಶಶಿಪ್ರಭಾ (21) ಮೃತಪಟ್ಟ ವಿದ್ಯಾರ್ಥಿನಿ. ಉಜಿರೆ ಎಸ್‌ಡಿಎಂ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಎಲೆಕ್ಟ್ರಾನಿಕ್ಸ್‌ ಆ್ಯಂಡ್‌ ಕಮ್ಯುನಿಕೇಶನ್‌ ವಿಭಾಗದ ಅಂತಿಮ ಪದವಿ ವಿದ್ಯಾರ್ಥಿನಿ.

ಶಶಿಪ್ರಭಾ ಶನಿವಾರ ಊರಿಗೆ ತೆರಳಲು ಪುತ್ತೂರಿಗೆ ಬಂದಿದ್ದರು. ಆಕೆಯ ಸಹೋದರ ಮಹೇಶ್‌ ಕುಮಾರ್‌ ಪುತ್ತೂರಿನ ಖಾಸಗಿ ಪ.ಪೂ. ಕಾಲೇಜಿನಲ್ಲಿ ಉದ್ಯೋಗಿಯಾಗಿದ್ದು, ಅವರ ಜತೆ ಬೊಳ್ವಾರಿನ ಹೊಟೇಲ್‌ ಒಂದರಲ್ಲಿ ಊಟ ಮಾಡಿ ಪುತ್ತೂರು ಬಸ್‌ ನಿಲ್ದಾಣದ ಕಡೆಗೆ ಸಹೋದರನ ಬೈಕಿನಲ್ಲಿ ತೆರಳುತ್ತಿದ್ದರು. ಆ ಸಂದರ್ಭ ಆಕೆಯ ಚೂಡಿದಾರ್‌ ಶಾಲು ಬೈಕಿನ ಚಕ್ರಕ್ಕೆ ಸಿಲುಕಿ ಆಕೆ ಬೈಕಿನಿಂದ ರಸ್ತೆಗೆ ಎಸೆಯಲ್ಪಟ್ಟರು. ಬೈಕಿನ ಹಿಂದಿನಿಂದಲೇ ಬರುತ್ತಿದ್ದ ಕೆಎಸ್‌ಆರ್‌ಟಿಸಿ ಬಸ್‌ ಶಶಿಪ್ರಭಾ ಅವರ ತಲೆ ಮೇಲೆ ಚಲಿಸಿತು. ಪರಿಣಾಮ ಆಕೆ ಸ್ಥಳದಲ್ಲೇ ಮೃತಪಟ್ಟರು.

ಸಿಹಿ ಹಂಚಲು ಆಗಮಿಸಿದ್ದರು

ಎಸ್‌ಡಿಎಂ ಎಂಜಿನಿಯರಿಂಗ್‌ ಕಾಲೇಜಿನ ಕ್ಯಾಂಪಸ್‌ ಸೆಲೆಕ್ಷನ್‌ಗೆ ಆಗಮಿಸಿದ್ದ ಟೆಕ್‌ ಮಹೀಂದ್ರಾ ಕಂಪೆನಿಯಲ್ಲಿ ಸಾಫ್ಟ್ವೇರ್‌ ಎಂಜಿನಿಯರ್‌ ಆಗಿ ಶನಿವಾರವಷ್ಟೇ ಶಶಿಪ್ರಭಾ ಆಯ್ಕೆಯಾಗಿದ್ದರು. ರಜೆ ಇದ್ದರೂ ಹಾಸ್ಟೆಲ್‌ನಲ್ಲಿದ್ದುಕೊಂಡು ಸಿದ್ಧತೆ ಮಾಡಿಕೊಂಡಿದ್ದರು. ರವಿವಾರ ಉದ್ಯೋಗಕ್ಕೆ ಆಯ್ಕೆಯಾಗಲು ಮಾರ್ಗದರ್ಶನ ನೀಡಿದ ಕಾಲೇಜಿನ ಪ್ಲೇಸ್‌ಮೆಂಟ್‌ ಅಧಿಕಾರಿ ಪ್ರೊ| ಶ್ರೀಧರ ಭಟ್‌ ಅವರ ಪುತ್ತೂರು ನಿವಾಸಕ್ಕೆ ಸಿಹಿ ಕೊಡಲು ತೆರಳಿದ್ದರು. ಸಿಹಿ ಇತ್ಯಾದಿ ಏನೂ ಬೇಡ, ಕಾಲೇಜಿನಲ್ಲಿಯೇ ನೀಡಿದರೆ ಸಾಕು ಎಂದು ಅವರು ಹೇಳಿದರೂ ಕೇಳದೇ ಮನೆಗೆ ತೆರಳಿ ಆಶೀರ್ವಾದ ಪಡೆದಿದ್ದರು. ಮರಳಿ ಪುತ್ತೂರಿಗೆ ಬಂದು ಮನೆಗೆ ಸಿಹಿ ಕೊಂಡೊಯ್ಯುವಾಗ ದುರ್ಘ‌ಟನೆ ಸಂಭವಿಸಿದೆ.

ಎರಡನೇ ಸುತ್ತಿನಲ್ಲಿ ಆಯ್ಕೆ

ಶಶಿಪ್ರಭಾ ಮಧ್ಯಮ ವರ್ಗದ ಕುಟುಂಬದ ಹೆಣ್ಣು ಮಗಳಾಗಿದ್ದು ಒಬ್ಬ ಸಹೋದರನನ್ನು ಹೊಂದಿದ್ದರು. ಶಂಕರನಾರಾಯಣ ದಂಪತಿಗೆ ಇವರಿಬ್ಬರೇ ಮಕ್ಕಳು. ಸಹೋದರ ಮಹೇಶ ಪುತ್ತೂರಿನ ಮಹೇಶ್‌ ಪ.ಪೂ. ಕಾಲೇಜಿನಲ್ಲಿ ರಾಸಾಯನ ಶಾಸ್ತ್ರ ಪ್ರಯೋಗಾಲಯದಲ್ಲಿ ಲ್ಯಾಬ್‌ ಇನ್‌ಸ್ಟ್ರಕ್ಟರ್‌. ಶಶಿಪ್ರಭಾ ಅವರು ಕ್ಯಾಂಪಸ್‌ ಆಯ್ಕೆಯಲ್ಲಿ ಮೊದಲ ಸುತ್ತಿನಲ್ಲಿ 19 ಮಂದಿಯಲ್ಲಿ ಆಯ್ಕೆಯಾಗಿರಲಿಲ್ಲ. ಎರಡನೇ ಸುತ್ತಿನಲ್ಲಿ ಇಬ್ಬರನ್ನು ಆಯ್ಕೆ ಮಾಡುವುದಾಗಿ ಕಂಪೆನಿಯವರು ಹೇಳಿದರು. ಅದರಂತೆ ಶಶಿಪ್ರಭಾ ಜುಲೈಯಿಂದ ಬೆಂಗಳೂರಿನ ಟೆಕ್‌ ಮಹೀಂದ್ರಾ ಕಂಪೆನಿಯಲ್ಲಿ ಉದ್ಯೋಗಿಯಾಗಲು ಆಯ್ಕೆಯಾಗಿದ್ದರು.

ವಿಧಿಯಾಟ...

ಶಶಿಪ್ರಭಾ ಸೌಮ್ಯ, ಸಾಧು ಸ್ವಭಾವದ ವಿದ್ಯಾರ್ಥಿನಿಯಾಗಿದ್ದು ಉತ್ತಮ ಅಂಕ ಗಳಿಸುತ್ತಿದ್ದರು. ಗುರು ಹಿರಿಯರಲ್ಲಿ ಭಕ್ತಿ ಶ್ರದ್ಧೆ ಇತ್ತು. ನನಗೆ ಸಿಹಿ ಕೊಡಲು ಬಂದು ಮನೆಗೆ ಸಿಹಿ ಹಂಚಲು ಹೊರಟಾಕೆಯನ್ನು ವಿಧಿ ಸೆಳೆದೊಯ್ದಿತು ಎಂದು ಪ್ರೊ| ಶ್ರೀಧರ ಭಟ್‌ ಉದಯವಾಣಿ ಜತೆಗೆ ನೆನಪು ಹಂಚಿಕೊಂಡರು. ಕಾಲೇಜಿಗೆ ರಜೆಯಾಗಿದ್ದರೂ ಕೆಲಸಕ್ಕೆ ಸೇರಬೇಕೆಂಬ ಅದಮ್ಯ ಉತ್ಸಾಹದಿಂದ ಬಂದು ಹಾಸ್ಟೆಲ್‌ನಲ್ಲಿ ಉಳಕೊಂಡು ಅಭ್ಯಸಿಸುತ್ತಿದ್ದರು ಎಂದು ಅವರು ಹೇಳಿದರು. ಪುತ್ತೂರು ಆಸ್ಪತ್ರೆಯಲ್ಲಿ ಎಸ್‌ಡಿಎಂನ ಮೆನೇಜರ್‌ ಹಾಗೂ ಉಪನ್ಯಾಸಕ ವರ್ಗದವರು ಅಂತಿಮ ನಮನ ಸಲ್ಲಿಸಿದರು. ಆಕೆಯ ಸ್ನೇಹಿತೆಯರು ಅಂತ್ಯಸಂಸ್ಕಾರಕ್ಕಾಗಿ ಆಕೆಯ ಮನೆಗೆ ತೆರಳಿದ್ದಾರೆ.

ಪುತ್ತೂರು ಸಂಚಾರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.