Write Comment     |     E-Mail To a Friend     |     Facebook     |     Twitter     |     Print

ಕೊಂಕ್ಣಿ ಕ್ಲಬ್ ಉಗ್ತಾವಣ್

ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೆಂ ಶಾಳಾ-ಕೊಲೆಜಿಂನಿ ಕೊಂಕ್ಣೆಕ್ ಬಳ್ವಂತ್ ಕರ್ಚಿ ನವಿ ಯೆವ್ಜಣ್-ಕೊಂಕ್ಣಿ ಕ್ಲಬ್ ಜುಲಾಯ್ 03ವೆರ್ ರುಜಾಯ್ ಸಭಾಸಾಲಾಂತ್ ಉಗ್ತಾವಣ್ ಜಾಲಿ.

ಕೊಂಕ್ಣಿ ಕ್ಲಬ್ ಉಗ್ತಾವ್ನ್ ಬರೆಂ ಮಾಗ್‌ಲ್ಲ್ಯಾ ಕಾರ್ಯಾಚೊ ಮುಕೇಲ್ ಸಯ್ರೊ ರುಜಾಯ್ಚೊ ವಿಗಾರ್ ಮಾ.ಬಾ. ಜೆ.ಬಿ. ಕ್ರಾಸ್ತಾನ್ ಅಕಾಡೆಮಿನ್ ಯೆವ್ಜಿಲ್ಲ್ಯಾ 50 ಕೊಂಕ್ಣಿ ಕ್ಲಬ್ಬಾಂ ಪಯ್ಕಿಂ ಪಯ್ಲೆಂ ಕ್ಲಬ್ ರುಜಾಯ್ ಕೊಲೆಜಿಂತ್ ಸುರು ಜಾತಾ ತಿ ಗಜಾಲ್ ಆಮ್ಕಾಂ ಖುಶೆಚಿ. ಹ್ಯಾ ನಿಮ್ತಿಂ ಕೊಂಕ್ಣಿ ಶಿಕ್ಪಾಕ್ ಪೂರಕ್ ಆನಿ ಸಾಹಿತ್ಯಾಕ್ ಪಾಟಿಂಬೊ ದಿಂವ್ಚೆಂ ವಾತಾವರಣ್ ಕೊಲೆಜಿಂತ್ ರುತಾ ಜಾಂವ್ ಮ್ಹಣ್ ಬರೆಂ ಮಾಗ್ಲೆಂ. ಕೊಂಕ್ಣಿ ಕ್ಲಬ್ಬಾಕ್ ಅಕಾಡೆಮಿ ಥಾವ್ನ್ ನವ್ಯಾ ಪುಸ್ತಕಾಂಚೆಂ ಭಂಡಾರ್ ದಿಲೆಂ.

ಹ್ಯಾಚ್ ವೆದಿ ಥಾವ್ನ್ ಹೇಮಾಚಾರ್ಯಾನ್ ಬರಯಿಲ್ಲೊ ‘ಸುಮತಿ ಮಟ್ವ್ಯಾ ಕಾಣಿಯಾಂಚೊ ಪುಂಜೊ ರುಜಾಯ್ ಕೊಲೆಜಿಚೊ ಪ್ರಾಂಶುಪಾಲ್ ಮಾ. ಆಲ್ವಿನ್ ಸೆರಾವೊನ್ ಉಗ್ತಾಯ್ಲೊ ತರ್, ದೆ. ಕುಡ್ಪಿ ವಾಸುದೇವ ಶೆಣೈ ಹಾಚೊ ದೋನ್ ನಾಟಕಾಂಚೊ ಜಮೊ ‘ಭಾಂಗ್ರಾಚಿ ಗೊದ್ದಡಿ ಕೆನರಾ ಕೊಲೆಜಿಚೊ ನಿರ್ದೇಶಕ್ ಶ್ರೀ ಜನಾರ್ಧನ್ ಪೈ ಪಿ. ಹಾಣೆಂ ಲೊಕಾರ್ಪಣ್ ಕೆಲೊ. ಕುಡ್ಪಿ ರಜನೀಕಾಂತ್ ಶೆಣೈ ವೆದಿರ್ ಹಾಜರ್ ಆಸುಲ್ಲೊ.

ಕಾರ್ಯಾಚೆಂ ಅಧ್ಯಕ್ಷ್‌ಪಣ್ ಘೆವ್ನ್ ಪ್ರಸ್ತಾವಿಕ್ ಉಲೊವ್ಪ್ ದಿಲ್ಲ್ಯಾ ಅಕಾಡೆಮಿ ಅಧ್ಯಕ್ಷ್ ರೊಯ್ ಕ್ಯಾಸ್ತೆಲಿನೊನ್ ಅಕಾಡೆಮಿಚಿ ಆನ್ಯೆಕ್ ನವಿ ಯೆವ್ಜಣ್ ಆಜ್ ಸುರು ಜಾತಾ. ಕೊಂಕ್ಣೆಚೊ ಫುಡಾರ್ ಆಸ್ಚೊ ಫಾಲ್ಯಾಂಚ್ಯಾ ಪಿಳ್ಗೆಥಂಯ್ ಮ್ಹಣ್ ವಳ್ಕುನ್ ಹಿಂ ಕ್ಲಬ್ಬಾಂ ಸುರು ಕೆಲ್ಯಾಂತ್. ಶಾಳಾ ಕೊಲೆಜಿಂನಿ ಹಾಚೊ ಭರ್ಪೂರ್ ಫಾಯ್ದೊ ಜೊಡಿಜೆ ಅಶೆಂ ಸಾಂಗ್ಲೆಂ. ವಿಶ್ವ್‌ವಿದ್ಯಾಲಯಾಂತ್ ಕೊಂಕ್ಣಿ ಪೀಠಾಚೊ ವಾವ್ರ್ ಎದೊಳ್‌ಚ್ ಸುರು ಕೆಲಾ. ವರ್‍ಸಾ ಭಿತರ್ ಹಿ ಯೆವ್ಜಣ್ ಪೋಂತ್ ಪಾವಂವ್ಕ್ ವಾವುರ್‍ತಲ್ಯಾಂವ್ ಮ್ಹಣ್‌ಯಿ ತಾಣೆ ಕಳಯ್ಲೆಂ.

ಕಾರ್ಯಾಚ್ಯಾ ಸುರ್ವೆರ್ ರುಜಾಯ್ ಕೊಲೆಜಿಚ್ಯಾ ವಿದ್ಯಾರ್ಥಿಂ ಥಾವ್ನ್ ಪ್ರಾರ್ಥನ್ ಗೀತ್ ಆನಿ ನಾಚ್ ಸಾದರ್ ಜಾಲೊ. ರಿಜಿಸ್ಟ್ರಾರ್ ಡೊ ದೇವದಾಸ್ ಪೈನ್ ಪ್ರಸ್ತಾವಿಕ್ ಉಲೊವ್ಪ್ ದೀವ್ನ್ ಸಾಂದೊ ಡೊ. ವಾರಿಜಾ ನಿರ್ಬೈಲ್ ಹಿಣೆಂ ವಂದಿಲೆಂ. ಸ್ಮಿತಾ ಪ್ರಭುನ್ ಕಾರ್ಯೆಂ ಚಲಯ್ಲೆಂ.