Write Comment     |     E-Mail To a Friend     |     Facebook     |     Twitter     |     Print

ಸತ್ಯಕ್ಕೆ ಪ್ರಿಯವಾದವನು ಸಮಾಜಕ್ಕೆ ಅಪ್ರಿಯನಾಗುತ್ತಾನೆ: ಲಕ್ಷ್ಮೀಶ ತೋಳ್ಪಾಡಿ

ಮಂಗಳೂರು: ವಿಶ್ವವಿದ್ಯಾನಿಲಯ ಕಾಲೇಜಿನ ಸ್ನಾತಕೋತ್ತರ ಹಿಂದಿ ವಿಭಾಗ, ಗಾಯತ್ರಿ ಪ್ರಕಾಶನ ಮತ್ತು ಹನೆಹಳ್ಳಿ ಬಳಗ ಜೊತೆಯಾಗಿ ಆಯೋಜಿಸಿದ್ದ ದೇವು ಹನೆಹಳ್ಳಿಯವರ ʼಮಾಯಕದ ನೆಲೆʼ ಪುಸ್ತಕ ಬಿಡುಗಡೆ ಮತ್ತು ಸಂವಾದ ಕಾರ್ಯಕ್ರಮ ಶನಿವಾರ ಕಾಲೇಜಿನ ರವೀಂದ್ರ ಕಲಾಭವನದಲ್ಲಿ ನಡೆಯಿತು.

ಪುಸ್ತಕ ಬಿಡುಗಡೆ ಮಾಡಿ ಮಾತನಾಡಿದ ನಿವೃತ್ತ ವಲಯ ಅರಣ್ಯಾಧಿಕಾರಿ ಕೆ.ಎಂ ಚಿಣ್ಣಪ್ಪ, ನಮ್ಮದಲ್ಲದ ಪ್ರಕೃತಿಯನ್ನು ಮುಂದಿನ ಜನಾಂಗಕ್ಕೆ ಒಪ್ಪಿಸುವುದು, ಆರೋಗ್ಯವಂತ ಪರಿಸರ ಒದಗಿಸುವುದು ನಮ್ಮ ಕರ್ತವ್ಯ. ಈಗ ಆರಂಭವಾಗಿರುವ ಪ್ರಕೃತಿ ವಿಕೋಪ ಕೇವಲ ಆರಂಭವಷ್ಟೆ. ಅರಣ್ಯನಾಶ ಮುಂದುವರಿದರೆ ಕುಡಿಯುವ ನೀರು ಸಿಗುವುದೂ ಕಷ್ಟವಾಗಬಹುದು, ಎಂದು ಎಚ್ಚರಿಸಿದರು.

ಪ್ರಾಧ್ಯಾಪಕ, ಚಿಂತಕ ಡಾ. ವಿವೇಕ ಧಾರೇಶ್ವರ, ಕವಿ ರವೀಂದ್ರನಾಥ ಟ್ಯಾಗೋರ್, ಗಾಂಧೀಜಿಯಂತವರು ಸಾಂಸ್ಕೃತಿಕ ಸಮಾಜದ ಬಗ್ಗೆ ಮಾತನಾಡಿದ್ದರು. ಅದರೆ ನಾವು ಅದನ್ನು ಮುಂದುವರಿಸದೆ, ನಮ್ಮ ಪರಿಕಲ್ಪನೆಗಳನ್ನೂ ಕಳೆದುಕೊಂಡೆವು. ಸ್ವಂತ ತಿಳುವಳಿಕೆಯಿಲ್ಲದೆ, ಸರ್ಕಾರವನ್ನು ಅತಿಯಾಗಿ ಅವಲಂಭಿಸಿದ್ದೇವೆ, ಎಂದರು. ಚಿಂತಕ ಲಕ್ಷ್ಮೀಶ ತೋಳ್ಪಾಡಿ, “ಸತ್ಯವನ್ನು ಪ್ರಿಯವಾಗಿ ಹೇಳಬೇಕು ಎಂದಾಗಲೇ ತಿರುಚುವಿಕೆ ಆರಂಭವಾಗುತ್ತದೆ. ಎಲ್ಲಾ ಮತಪಂಥಗಳು ದೇವರು ಸರ್ವಾಂತರ್ಯಾಮಿ ಎಂದರೂ ನಾವು ದೇವರಿಗೆ ನಮ್ಮದೇ ವ್ಯಾಖ್ಯಾನ ನೀಡುತ್ತೇವೆ”, ಎಂದರು.

ಲೇಖಕ ದೇವು ಹನೆಹಳ್ಳಿ, ಪ್ರಕಾಶಕ ಕೊಡೆತ್ತೂರು ಸಚ್ಚಿದಾನಂದ ಉಡುಪ, ವಿವಿ ಕಾಲೇಜಿನ ಪ್ರಾಂಶುಪಾಲ ಡಾ.ಉದಯ ಕುಮಾರ್ ಎಂ.ಎ, ಹಿಂದಿ ಸ್ನಾತಕೋತ್ತರ ವಿಭಾಗದ ಮುಖ್ಯಸ್ಥೆ ಡಾ. ಸುಮಾ ಆರ್ ಮೊದಲಾದವರು ಭಾಗವಹಿಸಿದ್ದರು. ಸಂವಾದದಲ್ಲಿ ಅನೇಕ ಹಿರಿಯ ಸಾಹಿತಿಗಳು, ಚಿಂತಕರು ಉಪಸ್ಥಿತರಿದ್ದರು.

‘ಓದುವಿಕೆ ಉದ್ಯೋಗಕ್ಕೆ ಮಾತ್ರವಲ್ಲ, ಜ್ಞಾನ ಸಂಪಾದನೆಗೆ’
ಪಿಲಿಕುಳದಲ್ಲಿ ಇನ್ಸ್ಪೈರ್‍ ಇಂಟರ್ನ್‍ಶಿಪ್‍ ಶಿಬಿರ ಉದ್ಘಾಟಿಸಿದ ಪ್ರೊ. ಜಿ.ಡಿ. ಕೇದ್ಕರ್

ಮಂಗಳೂರು: ಭಾರತದಲ್ಲಿ ಇನ್ನೂ ಓದುವುದು ಉದ್ಯೋಗಕ್ಕೆ ಮತ್ತು ಹೊಟ್ಟೆಪಾಡಿಗೆ ಎಂಬ 30 ವರ್ಷಗಳ ಹಿಂದಿನ ಮನಸ್ಥಿತಿಯಿದೆ. ಹೀಗಾಗಿ 11 ವಿಶ್ವವಿದ್ಯಾನಿಲಯಗಳಿರುವ ಇಸ್ರೇಲ್‍ ವಿಜ್ಞಾನದಲ್ಲಿ ಮಾಡಿರುವ ಸಾಧನೆಯನ್ನು 1000 ಕ್ಕೂ ಹೆಚ್ಚು ವಿಶ್ವವಿದ್ಯಾನಿಲಯಗಳಿರುವ ಭಾರತಕ್ಕೆ ಮಾಡಲಾಗುತ್ತಿಲ್ಲ, ಎಂದು ಔರಂಗಾಬಾದ್ನ ಡಾ. ಬಿ.ಎ.ಎಂ. ವಿಶ್ವವಿದ್ಯಾನಿಲಯದ ಪಾಲ್ ಹೆಬರ್ಟ್ ಸೆಂಟರ್ ಫಾರ್ ಡಿಎನ್ಎ ಬಾರ್ಕೋಡಿಂಗ್ ಆಂಡ್ ಬಯೋಡೈವರ್ಸಿಟಿ ಸ್ಟಡೀಸ್ ನಿರ್ದೇಶಕ ಪ್ರೊ. ಜಿ.ಡಿ. ಕೇದ್ಕರ್ ಅಭಿಪ್ರಾಯಪಟ್ಟಿದ್ದಾರೆ.

ವಿಶ್ವವಿದ್ಯಾನಿಲಯ ಕಾಲೇಜು ಮಂಗಳೂರಿನ ಸೂಕ್ಷ್ಮಾಣುಜೀವಿಶಾಸ್ತ್ರ ವಿಭಾಗ, ಭಾರತ ಸರ್ಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ವಿಭಾಗದ ಪ್ರಾಯೋಜಕತ್ವದೊಂದಿಗೆ, ವಿಜ್ಞಾನ ವಿದ್ಯಾರ್ಥಿಗಳಿಗಾಗಿ ಪಿಲಿಕುಳದ ಪ್ರಾದೇಶಿಕ ವಿಜ್ಞಾನ ಕೇಂದ್ರದ ಸಭಾಂಗಣದಲ್ಲಿ ಏರ್ಪಡಿಸಿರುವ ಡಿಎಸ್‍ಟಿ- ಇನ್ಸ್ಪೈರ್‍ ಇಂಟರ್ನ್‍ಶಿಪ್‍ ಶಿಬಿರ 2019 ರ ಉದ್ಘಾಟನಾ ಸಮಾರಂಭದಲ್ಲಿ ಗುರುವಾರ ಮುಖ್ಯ ಅತಿಥಿಯಾಗಿ ಮಾತನಾಡಿದ ಅವರು, ವಿದೇಶಕ್ಕೆ ಹಾರುತ್ತಿರುವ ಭಾರತದ ಪ್ರತಿಭಾವಂತ ವಿಜ್ಞಾನಿಗಳಿಗೆ ದೇಶದಲ್ಲೇ ಅವಕಾಶ ಒದಗಿಸಲು ಈ ಶಿಬಿರವನ್ನು ಆಯೋಜಿಸಲಾಗಿದೆ. ಇದು ಒಂದು ಕಾರ್ಯಕ್ರಮವಾಗಿರದೆ, ವಿವಿಧ ಹಂತಗಳಲ್ಲಿ ಪ್ರತಿಭಾವಂತರಿಗೆ ಉನ್ನತ ವಿದ್ಯಾಭ್ಯಾಸ ಪಡೆದು ಬೋಧನೆಗೂ ಅವಕಾಶಮಾಡಿಕೊಡುತ್ತದೆ, ಎಂದರು.

ಪಿಲಿಕುಳ ಪ್ರಾದೇಶಿಕ ವಿಜ್ಞಾನ ಕೇಂದ್ರದ ನಿರ್ದೇಶಕ ಪ್ರೊ. ಕೆ ವಿ ರಾವ್ ತಮ್ಮ ಉದ್ಘಾಟನಾ ಭಾಷಣದಲ್ಲಿ, ನಮ್ಮ ಬದಲಾಗಬೇಕಾದ ಶಿಕ್ಷಣನೀತಿಯ ಕುರಿತು ಉಲ್ಲೇಖಿಸುವುದರ ಜೊತೆಗೆ ವಿದ್ಯಾರ್ಥಿಗಳು ಚೌಕಟ್ಟಿಗಿಂತಲೂ ಹೊರಗೆ ಯೋಚಿಸುವುದನ್ನು ಕಲಿಯಬೇಕು. ಮುಕ್ತ ಮನಸ್ಸಿನಿಂದ ಹೊಸ ವಿಷಯಗಳನ್ನು ಕಲಿತು ಸಮಾಜಕ್ಕೆ ನೆರವಾಗಬೇಕು, ಎಂದರು. ಅಧ್ಯಕ್ಷತೆ ವಹಿಸಿದ್ದ ಕಾಲೇಜಿನ ಪ್ರಾಂಶುಪಾಲ ಡಾ.ಉದಯ ಕುಮಾರ್ ಎಂ.ಎ, ಮಹತ್ತರ ಕನಸಿನೊಂದಿಗೆ ಬದ್ಧತೆಯಿಂದ ಗುರಿ ತಲುಪಲು ಸಾಧ್ಯ. ಜೀವನವನ್ನು ಸಂತೋಷದಿಂದ ಅನುಭವಿಸಬೇಕು. ನಿರಾಶೆ ಪಡಬಾರದು. ಶಿಕ್ಷಣವೆಂದರೆ ಶಿಕ್ಷೆಯಾಗಬಾರದು, ಎಂದರು.

ನವೆಂಬರ್‍ 18 ರವರೆಗೆ ನಡೆಯಲಿರುವ ಶಿಬಿರದಲ್ಲಿ ವಿವಿಧ ಕಾಲೇಜುಗಳ ಸುಮಾರು 200ಕ್ಕೂ ಹೆಚ್ಚು ವಿದ್ಯಾರ್ಥಿಗಳು  ಭಾಗವಹಿಸಿದ್ದಾರೆ. ರಸಾಯನಶಾಸ್ತ್ರ ವಿಭಾಗದ ಡಾ. ಕೆ. ಲಕ್ಷ್ಮಣ್, ಗಣಕ ವಿಜ್ಞಾನದ ಡಾ. ವೀರಭದ್ರಪ್ಪ, ಸೂಕ್ಷ್ಮಾಣುಜೀವಿಶಾಸ್ತ್ರ ವಿಭಾಗದ ಸುಮಂಗಲಾ ಮೊದಲಾದವರು ಭಾಗವಹಿಸಿದ್ದರು. ಸೂಕ್ಷ್ಮಾಣುಜೀವಿಶಾಸ್ತ್ರ ವಿಭಾಗದ ಮುಖ್ಯಸ್ಥೆ ಡಾ. ಭಾರತಿ ಪ್ರಕಾಶ್‌ ಸ್ವಾಗತಿಸಿದರೆ, ಪ್ರಾಣಿಶಾಸ್ತ್ರ ವಿಭಾಗದ ಡಾ. ಕೆ.ಎ. ನಾಗರತ್ನ ವಂದಿಸಿದರು. ಸುಶ್ಮಿ ಕಾರ್ಯಕ್ರಮ ನಿರ್ವಹಿಸಿದರು. ಐಶ್ವರ್ಯ ಶೆಣೈ ಪ್ರಾರ್ಥನೆ ಸಲ್ಲಿಸಿದರು.