Write Comment     |     E-Mail To a Friend     |     Facebook     |     Twitter     |     Print

ಬೆಂಗಳೂರು: ಸರ್ಕಾರಿ ಸ್ವಾಮ್ಯದ ವಿಜಯಾ ಬ್ಯಾಂಕ್‌ ತನ್ನ ಗ್ರಾಹಕರ ಅನುಕೂಲಕ್ಕಾಗಿ ’ವಿಜಯಾ ಕಿಸಾನ್‌ ಗೃಹ ಸಾಲ’, ’ಎಂಎಸ್‌ಇ ವಿಜಯ್‌’ ಮತ್ತು ’ವಿ-ಇ ಪಾಸ್‌ಬುಕ್‌’ ಎಂಬ ಮೂರು ನೂತನ ಉತ್ಪನ್ನಗಳನ್ನು ಬಿಡುಗಡೆ ಮಾಡಿದೆ.

ಇತ್ತೀಚೆಗೆ ಕೇಂದ್ರ ಕಚೇರಿಯ ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಬ್ಯಾಂಕಿನ ಅಧ್ಯಕ್ಷ ಎಚ್‌.ಎಸ್‌. ಉಪೇಂದ್ರ ಕಾಮತ್‌ ಅವರು ನೂತನ ಉತ್ಪನ್ನಗಳನ್ನು ಬಿಡುಗಡೆ ಮಾಡಿ ಮಾತನಾಡಿದರು. ರೈತರಿಗಾಗಿ ವಿಜಯಾ ಕಿಸಾನ್‌ ಗೃಹ ಸಾಲ, ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಿಗಳಿಗಾಗಿ ಎಂಎಸ್‌ಇ ವಿಜಯ್‌ ಸಾಲ, ಮೊಬೈಲ್‌ನಲ್ಲೇ ಪಾಸ್‌ ಬುಕ್‌ ಸೌಲಭ್ಯ ಸಿಗುವ ವಿ- ಇ ಪಾಸ್‌ಬುಕ್‌ ಸೇವೆ ಹಾಗೂ ವಿದೇಶಿ ವಿನಿಮಯ ಕಾರ್ಯಾಚರಣೆ (ಫೋರೆಕ್ಸ್‌) ಉತ್ಪನ್ನಗಳನ್ನು ಪರಿಚಯಿಸಿದ್ದೇವೆ ಎಂದು ನುಡಿದರು. ಈ ಹೊಸ ಉತ್ಪನ್ನಗಳು ವಿಜಯಾ ಬ್ಯಾಂಕಿನ ಸ್ಟಾರ್‌ ಉತ್ಪನ್ನಗಳಾಗಿವೆ ಎಂದರು.

ಕೃಷಿಯಲ್ಲಿ ಗಳಿಸಿದ ಆದಾಯದಿಂದ ಮನೆ ಕಟ್ಟಿಕೊಳ್ಳಬೇಕೆಂದು ಬಯಸುವ ಪ್ರಗತಿಪರ ರೈತರಿಗೆ ವಿಜಯಾ ಕಿಸಾನ್‌ ಗೃಹ ಸಾಲ ವರದಾನವಾಗಲಿದೆ. ಈ ಸಾಲದ ಗರಿಷ್ಠ ಅವಧಿ 30 ವರ್ಷಗಳಾಗಿದ್ದು, ಶೇ.10.20ರ (ಬೇಸ್‌ ರೇಟ್‌ ದರ) ಅತಿ ಕಡಿಮೆ ಬಡ್ಡಿ ದರ ಇದಕ್ಕಿದೆ. ಎಂಎಸ್‌ಇ ಕ್ಷೇತ್ರಕ್ಕೆ ವಿಶೇಷವಾಗಿ ಪರಿಚಯಿಸಿರುವ ’ಎಂಎಸ್‌ಇ ವಿಜಯ್‌’ನಡಿ ಸಾಲದ ಮೊತ್ತ ಗರಿಷ್ಠ 100 ಲಕ್ಷ ರೂ. ವರೆಗೆ ಇರುತ್ತದೆ.

ಮೊಬೈಲ್‌ಗೇ ಪಾಸ್‌ಬುಕ್‌:
ವಿಜಯಾ ಬ್ಯಾಂಕಿನ 83ನೇ ಸಂಸ್ಥಾಪನಾ ವರ್ಷದ ಅಂಗವಾಗಿ ವಿ-ಇ ಪಾಸ್‌ಬುಕ್‌ ಅನ್ನು ಸಹ ಪರಿಚಯಿಸಿದ್ದೇವೆ. ಈ ಸೌಲಭ್ಯ ಒಳಗೊಂಡ ಗ್ರಾಹಕರು ಇನ್ನು ಮುಂದೆ ತಮ್ಮ ಖಾತೆಯ ವಹಿವಾಟಿನ ವಿವರಗಳನ್ನು ಬ್ಯಾಂಕಿಗೆ ಹೋಗಿ ಪಡೆಯಬೇಕೆಂದಿಲ್ಲ. ಎಲ್ಲವನ್ನೂ ತಮ್ಮ ಮೊಬೈಲ್‌ನಲ್ಲೇ ನೋಡಬಹುದಾದಂತಹ ವಿಶಿಷ್ಟ ಸೇವೆ ಇದಾಗಿದೆ.

ಬಡ್ಡಿ ದರ ಕಡಿತ:
ದೀಪಾವಳಿ ಸಂಭ್ರಮದ ಪ್ರಯುಕ್ತ ಗೃಹ ಸಾಲದ ಬಡ್ಡಿ ದರವನ್ನು ಶೇ.10.25ಕ್ಕೆ, ವಾಹನ ಸಾಲವನ್ನು ಶೇ.10.60ಕ್ಕೆ ಹಾಗೂ ಗ್ರಾಹಕರು ಕೊಳ್ಳುವ ಬೆಲೆಬಾಳುವ ವಸ್ತುಗಳ ಮೇಲಿನ ಬಡ್ಡಿ ದರವನ್ನು ಶೇ.12.50ಕ್ಕೆ ಇಳಿಸಲಾಗಿದೆ ಎಂದು ಕಾಮತ್‌ ತಿಳಿಸಿದರು.
ಕಾರ್ಯಕ್ರಮದಲ್ಲಿ ಕಾರ್ಯನಿರ್ವಾಹಕ ನಿರ್ದೇಶಕ ಕೆ.ಆರ್‌. ಶೆಣೈ, ಬಿ.ಎಸ್‌. ಶ್ರೀರಾಮ ಹಾಗೂ ಹಿರಿಯ ಅಧಿಕಾರಿಗಳು ಭಾಗವಹಿಸಿದ್ದರು.