Write Comment     |     E-Mail To a Friend     |     Facebook     |     Twitter     |     Print

ನವದೆಹಲಿ: ಸ್ವದೇಶೀಯರಿಗೆ ಉದ್ಯೋಗ ಕಲ್ಪಿಸಿಕೊಡುವ ನಿಟ್ಟಿನಲ್ಲಿ ಸೌದಿ ಸರಕಾರವು ಹೊಸದಾಗಿ ಜಾರಿಗೊಳಿಸಿರುವ ನಿತಾಖತ್‌ ಕಾನೂನಿನಿಂದಾಗಿ ಸೂಕ್ತವಾದ ದಾಖಲೆಗಳಿಲ್ಲದೆ ಸೌದಿ ಅರೇಬಿಯಾದಲ್ಲಿ ಅಕ್ರಮವಾಗಿ ಉದ್ಯೋಗದಲ್ಲಿದ್ದ ಸುಮಾರು 1.34 ಲಕ್ಷ ಭಾರತೀಯರು ಈಗಾಗಲೇ ತಾಯ್ನಾಡಿಗೆ ವಾಪಸಾಗಿದ್ದಾರೆ. ಸದ್ಯ ಭಾರತ ಸರಕಾರ ಸೌದಿಯ ಹೊಸ ಕಾನೂನಿನಿಂದಾಗಿ ಉದ್ಭವವಾಗಿರುವ ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಅವಲೋಕಿಸುತ್ತಿದೆ ಎಂದು ಸಾಗರೋತ್ತರ ವ್ಯವಹಾರಗಳ ಸಚಿವ ವಯಲಾರ್‌ ರವಿ ಹೇಳಿದ್ದಾರೆ.

ಸಮರ್ಪಕವಾದ ದಾಖಲೆಪತ್ರಗಳಿಲ್ಲದೆ ಅಕ್ರಮವಾಗಿ ದುಡಿಯುತ್ತಿರುವ ಮತ್ತು ಸಣ್ಣಪುಟ್ಟ ವ್ಯಾಪಾರಗಳಲ್ಲಿ ತೊಡಗಿಕೊಂಡಿರುವ ವಿದೇಶಿಯರ ವಾಪಸಾತಿಗೆ ಸೌದಿ ಸರಕಾರ ನ.3ರ ಗಡುವು ವಿಧಿಸಿತ್ತು. ಈ ಗಡುವು ಕೊನೆಗೊಂಡು ಇದೀಗ ಎರಡು ದಿನಗಳು ಕಳೆದಿದ್ದು ಈ ವರೆಗೆ ಯಾವುದೇ ಭಾರತೀಯನಿಗೆ ಸೌದಿ ಅಧಿಕಾರಿಗಳು ಕಿರುಕುಳ ನೀಡಿದ ಬಗೆಗೆ ವರದಿಯಾಗಿಲ್ಲ ಎಂದವರು ಈ ಕುರಿತ ಪ್ರಶ್ನೆಗೆ ಉತ್ತರಿಸಿದರು.

ಹೊಸ ಕಾನೂನು ಜಾರಿಯಾದ ಬಳಿಕ ಸೌದಿಯಲ್ಲಿನ ಭಾರತೀಯರ ಸಂಖ್ಯೆ 24 ಲಕ್ಷದಿಂದ 28 ಲಕ್ಷಕ್ಕೇರಿದೆ. ಸಮರ್ಪಕ ದಾಖಲೆ ಪತ್ರಗಳಿಲ್ಲದವರಷ್ಟೇ ಇದೀಗ ತಾಯ್ನಾಡಿಗೆ ಹಿಂದಿರುಗುತ್ತಿದ್ದಾರೆ ಎಂದು ವಯಲಾರ್‌ ರವಿ ಇದೇ ವೇಳೆ ಸ್ಪಷ್ಟಪಡಿಸಿದರು.