Write Comment     |     E-Mail To a Friend     |     Facebook     |     Twitter     |     Print

ಮಂಗಳೂರು: ಇಂಡಿಯನ್‌ ಮುಜಾಹಿದೀನ್‌ ಉಗ್ರ ಸಂಘಟನೆಗೆ ಅಗತ್ಯವಾದ ಹಣ ನಿರ್ವಹಣೆ ಮಾಡಿದ್ದಾರೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಮಂಗಳೂರಿನ ಆಯೇಷಾ ಬಾನು ಹಾಗೂ ಆಕೆಯ ಪತಿ ಜುಬೇರ್‌ನನ್ನು ಪಣಂಬೂರು ಪೊಲೀಸರು ಸೋಮವಾರ ರಾತ್ರಿಯೇ ವಶಕ್ಕೆ ತೆಗೆದುಕೊಂಡಿದ್ದು, ವಿಚಾರಣೆ ನಡೆಸುತ್ತಿದ್ದಾರೆ. ಮೂಲತಃ ಹಿಂದೂ ಯುವತಿಯಾಗಿದ್ದ ಈಕೆ ಮಡಿಕೇರಿಯವಳು. ನಂತರ ಜುಬೇರ್‌ನನ್ನು ಪ್ರೇಮಿಸಿ, ವಿವಾಹವಾಗಿ ಇಸ್ಲಾಂಗೆ ಮತಾಂತರಗೊಂಡಿದ್ದಾಳೆ. ಮಂಗಳೂರು ಸಮೀಪದ ಪಂಜಿಮೊಗರುವಿನಲ್ಲಿ ’ಆಯೇಷಾ ಮಂಜಿಲ್‌’ ಎಂಬ ಮನೆಯಲ್ಲಿ ಮೂವರು ಮಕ್ಕಳೊಂದಿಗೆ ವಾಸವಾಗಿದ್ದಾಳೆ.

ಸೋಮವಾರ ರಾತ್ರಿಯೇ ವಶಕ್ಕೆ ಪಡೆದುಕೊಂಡಿರುವ ಪೊಲೀಸರು, ಮಂಗಳವಾರ ಸಂಜೆ ಸುಮಾರು 4.30ರ ವೇಳೆಗೆ ಇವರಿಬ್ಬರನ್ನು ಪಂಜಿಮೊಗರಿನಲ್ಲಿರುವ ಅವರ ಮನೆಗೆ ಕರೆದುಕೊಂಡು ಬಂದು, ಮನೆಯನ್ನು ಪರಿಶೀಲನೆ ಮಾಡಿದರು. ಸುಮಾರು 1 ತಾಸು ವಿಚಾರಣೆ ನಡೆಸಿದರು. ಬಿಹಾರ ಪೊಲೀಸರ ಸೂಚನೆ ಮೇರೆಗೆ ಇವರಿಬ್ಬರನ್ನು ವಶಕ್ಕೆ ಪಡೆಯಲಾಗಿದೆ. ಬಿಹಾರದಿಂದ ಈಗಾಗಲೇ ಪೊಲೀಸ್‌ ಅಧಿಕಾರಿಯೊಬ್ಬರು ಆಗಮಿಸಿದ್ದು, ವಿಚಾರಣೆ ವೇಳೆ ಉಪಸ್ಥಿತರಿದ್ದರು. ಹೆಚ್ಚಿನ ವಿಚಾರಣೆಗೆ ಬಿಹಾರದಿಂದ ಇನ್ನೊಂದು ತಂಡ ಆಗಮಿಸುತ್ತಿದೆ. ಸ್ಥಳೀಯ ವಿಚಾರಣೆ ಬಳಿಕ ಆಯೇಷಾಳನ್ನು ಬಿಹಾರಕ್ಕೆ ಕರೆದೊಯ್ಯಲಾಗುತ್ತದೆ ಎಂದು ಮೂಲಗಳು ತಿಳಿಸಿವೆ.

ಆಯೇಷಾ ಬಾನುವಿಗೆ ಈ ಹಣವನ್ನು ಯಾರು ಒದಗಿಸುತ್ತಿದ್ದರು. ಆಕೆಯನ್ನು ಬಳಸಿಕೊಂಡು ಅವಳ ಹೆಸರಿನಲ್ಲಿ ಈ ವ್ಯವಹಾರ ನಡೆಸಲಾಗುತ್ತಿತ್ತೇ?. ಆಕೆಯ ಪತಿ ಜುಬೇರ್‌ ಇದರಲ್ಲಿ ಪಾತ್ರ ಹೊಂದಿದ್ದಾನೆಯೇ?. ಆತನೇ ಇದರ ಪ್ರಮುಖ ಸೂತ್ರಧಾರನೇ? ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.

ಆಶಾ ಆದಳು ಆಯೇಷಾ:
ಸುಮಾರು 35 ವರ್ಷ ಪ್ರಾಯದ ಆಯೇಷಾ ಮೂಲತಃ ಹಿಂದೂ ಯುವತಿ, ಮಡಿಕೇರಿಯ ನಿವಾಸಿ. ಸುಮಾರು 17 ವರ್ಷಗಳ ಹಿಂದೆ ಮಂಗಳೂರಿನ ಜುಬೇರ್‌ ಎಂಬಾತ ತನ್ನ ಬೀಡಿ ವ್ಯಾಪಾರ ಸಂಬಂಧ ಮಡಿಕೇರಿಗೆ ಬಂದಿದ್ದ. ಆಗ ಆಶಾ ಹೆಸರಿನ ಈಕೆಯನ್ನು ಪ್ರೇಮಿಸಿ ವಿವಾಹವಾಗಿದ್ದ. ಬಳಿಕ ಆಶಾ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡಿದ್ದಳು. ಜುಬೇರ್‌ಗೆ ಆಯೇಷಾ ಎರಡನೇ ಪತ್ನಿ. ಇದಕ್ಕೂ ಮೊದಲು ಆತ ಬಜಪೆಯ ಯುವತಿಯನ್ನು ವಿವಾಹವಾಗಿದ್ದ. ಈಗ ಆಯೇಷಾಗೆ ಇಬ್ಬರು ಗಂಡು ಮಕ್ಕಳು, ಒಬ್ಬಳು ಹೆಣ್ಣು ಮಗಳು ಇದ್ದಾಳೆ.

ಬಂಧನಕ್ಕೆ ಬಲೆ ಬೀಸಿದ್ದು ಸಿಕ್ಕಿದ್ದು ಹೀಗೆ:
ಪಟ್ನಾ ಸ್ಫೋಟದ ರೂವಾರಿ, ಇಂಡಿಯನ್‌ ಮುಜಾಹಿದೀನ್‌ ಸಂಘಟನೆಗೆ ಅಗತ್ಯ ಹಣ ಪೂರೈಕೆ ಜಾಲದಲ್ಲಿ ಮಂಗಳೂರಿನ ಮಹಿಳೆಯೊಬ್ಬಳು ಪ್ರಮುಖ ನಂಟು ಹೊಂದಿದ್ದಾಳೆ ಎಂಬ ಮಾಹಿತಿ ಗುಪ್ತಚರ ಇಲಾಖೆಗೆ ಲಭ್ಯವಾಗಿತ್ತು. ಅದರಂತೆ ರಾಷ್ಟ್ರೀಯ ತನಿಖಾ ದಳ ಕಾರ್ಯಾಚರಣೆ ಆರಂಭಿಸಿತ್ತು. ಬಿಹಾರದ ಲಖೀಸರೈನಲ್ಲಿ ಮುಹಮ್ಮದ್‌ ಫಯಾಜ್‌ ಮತ್ತು ಮುಹಮ್ಮದ್‌ ಕಿಸ್ಮತ್‌ ಅನ್ಸಾರಿ ಎಂಬುವರು ಸ್ಥಳೀಯ ಹಿಂದೂ ಯುವಕರಿಗೆ ಹಣದ ಆಮಿಷ ಒಡ್ಡಿ, ನಕಲಿ ಹೆಸರು ಹಾಗೂ ವಿಳಾಸ ನೀಡಿ ಅವರ ಹೆಸರಿನಲ್ಲಿ ಬ್ಯಾಂಕ್‌ ಖಾತೆಗಳನ್ನು ತೆರೆಸುತ್ತಿದ್ದರು. ಇಂತಹ ಸುಮಾರು 35 ಖಾತೆಗಳನ್ನು ತೆರೆಯಲಾಗಿತ್ತು. ಮಂಗಳೂರಿನಿಂದ ಆಯೇಷಾ ಬಾನು ಖಾತೆ ತೆರೆದಿರುವ ಯುವಕರಿಗೆ ಫೋನ್‌ ಮಾಡಿ ಯಾವ ಖಾತೆಗೆ ಎಷ್ಟು ಹಣ ಹಾಕಬೇಕು ಎಂದು ತಿಳಿಸುತ್ತಿದ್ದಳು. ಹೀಗೆ ವರ್ಗಾವಣೆ ಮಾಡಿದ ಹಣಕ್ಕೆ ಶೇ.10ರಷ್ಟು ಹಣವನ್ನು ಕಮಿಷನ್‌ ರೂಪದಲ್ಲಿ ಯುವಕರಿಗೆ ನೀಡಲಾಗುತ್ತಿತ್ತು. ಈ ಜಾಲದ ಹಾದಿ ಹಿಡಿದು ಪೊಲೀಸರು ಆಯೇಷಾಗೆ ಬಲೆ ಬೀಸಿದರು ಎನ್ನಲಾಗಿದೆ.

ಪಂಜಿಮೊಗರುವಿನಲ್ಲಿದೆ ’ಆಯೇಷಾ ಮಂಜಿಲ್‌’:
ಉಗ್ರ ಚಟುವಟಿಕೆಯಲ್ಲಿ ಭಾಗಿಯಾಗಿ ಸಿಕ್ಕಿಬಿದ್ದಿರುವ ಆಯೇಷಾ ಬಾನು ಮಂಗಳೂರು ಹೊರವಲಯದ ಪಂಚಿಮೊಗರುನಲ್ಲಿ ವಾಸವಾಗಿದ್ದಳು. ಮಂಗಳೂರು ನಗರದಿಂದ ಸುಮಾರು 9.8 ಕಿ.ಮೀ ದೂರದ, ಕೂಳೂರಿನಿಂದ ಕಾವೂರಿಗೆ ಸಾಗುವ ರಸ್ತೆಯಲ್ಲಿದೆ ಪಂಜಿಮೊಗರು. ಅಲ್ಲಿಂದ ಒಳಕ್ಕೆ ಸುಮಾರು 1 ಕಿ.ಮೀ. ಸಾಗಿದರೆ ಮಂಜೂಟ್ಟಿ ಎಂಬ ಸ್ಥಳವಿದೆ. ಮುಖ್ಯರಸ್ತೆಯಿಂದ ಸ್ವಲ್ಪ ದೂರಕ್ಕೆ ಓಣಿಯಲ್ಲಿ ಸಾಗಿದರೆ ಕೊನೆಯಲ್ಲಿದೆ ಆಯೇಷಾ ಬಾನು ಮನೆ.

ಆಯೇಷಾ ಮಂಜಿಲ್‌ ಹೆಸರಿನ ಮನೆಯನ್ನು ಆಯೇಷಾ ಬಾನುವಿನ ಗಂಡ ಜುಬೇರ್‌ ಸುಮಾರು 3 ವರ್ಷಗಳ ಹಿಂದೆ ಖರೀದಿಸಿದ್ದ. ಈ ಮನೆಯಲ್ಲಿ ಆಯೇಷಾ ಬಾನು ಹಾಗೂ ಮೂವರು ಮಕ್ಕಳು ಮಾತ್ರ ಇರುತ್ತಿದ್ದರು. ಪತಿ ಜುಬೇರ್‌ 2 ಅಥವಾ 3 ದಿನಗಳಿಗೊಮ್ಮೆ ಬರುತ್ತಿದ್ದ. ದೊಡ್ಡ ಮಗ ಈ ವರ್ಷ ಎಸ್‌ಎಸ್‌ಎಲ್‌ಸಿಯಲ್ಲಿ ಅನುತ್ತೀರ್ಣನಾದ ಬಳಿಕ ತಂದೆಯ ಬೀಡಿ ಬ್ರಾಂಚ್‌ವೊಂದರ ವ್ಯವಹಾರ ನೋಡಿಕೊಳ್ಳುತ್ತಿದ್ದಾನೆ. ಆಯೇಷಾ ಬಾನು ಮನೆ ಸುತ್ತಮುತ್ತಲಿನ ಕೆಲವರಿಂದ ಬೀಡಿ ಕಟ್ಟಿಸುತ್ತಿದ್ದಳು. ಪರಿಸರದ ಎಲ್ಲರೊಂದಿಗೆ ಉತ್ತಮ ಸಂಬಂಧ ಹೊಂದಿದ್ದಳು. ವ್ಯವಹಾರ ನಿಮಿತ್ತ ಹೊರಗಡೆ ಹೋಗಿ ಬರುತ್ತಿದ್ದಳು. ಉಳಿದಂತೆ ಅವರ ಇನ್ನಿತರ ಯಾವುದೇ ಚಟುವಟಿಕೆಗಳ ಬಗ್ಗೆ ಮಾಹಿತಿಯಿಲ್ಲ ಎನ್ನುತ್ತಾರೆ ನೆರೆಹೊರೆಯ ನಿವಾಸಿಗಳು.

ಆಯೇಷಾ ಮಂಜಿಲ್‌ಗೆ ಬೀಗ:
ಪಂಜಿಮೊಗರಿನಲ್ಲಿರುವ ಮನೆಗೆ ಈಗ ಬೀಗ ಹಾಕಲಾಗಿದೆ. ಜುಬೇರ್‌ನ ಹೊಂಡಾ ಆ್ಯಕ್ಟಿವಾ ಸ್ಕೂಟರ್‌ ಮನೆಯ ಪಕ್ಕದಲ್ಲಿದ್ದರೆ, ಹುಂಡೈ ಇಯಾನ್‌ ಕಾರು ಮನೆಯ ಪಕ್ಕದ ರಸ್ತೆಯಲ್ಲಿ ನಿಂತಿದೆ. ಮನೆಯ ಹಿಂದುಗಡೆ ಕತ್ತರಿಸಿ ಬಿಟ್ಟಿರುವ ಬೀಡಿ ಎಲೆಯ ಚೂರುಗಳು, ಎರಡು ಖಾಲಿ ಸಿಗರೇಟು ಪ್ಯಾಕ್‌ಗಳು, ಒಣಗಲು ಹಾಕಿದ ಬಟ್ಟೆಗಳು ಕಣ್ಣಿಗೆ ರಾಚುತ್ತಿವೆ.

ದಿಢೀರ್‌ ಶ್ರೀಮಂತನಾದ ಜುಬೇರ್‌:
ಕೆಲ ಕಾಲ ಕೊಲ್ಲಿ ರಾಷ್ಟ್ರದಲ್ಲಿ ಜುಬೇರ್‌ ಕೆಲಸ ಮಾಡಿದ್ದ. ಬಳಿಕ ಊರಿನಲ್ಲಿ ಬಂದು ತಂದೆಯ ಬೀಡಿ ಬ್ರಾಂಚ್‌ ನೋಡಿಕೊಂಡಿದ್ದ. ಆದರೆ ಆತ ಅಷ್ಟೇನೂ ಶ್ರೀಮಂತನಾಗಿರಲಿಲ್ಲ. ಆದರೆ ಇತ್ತೀಚೆಗೆ ಮನೆಯನ್ನು ಖರೀದಿಸಿದ. ಹುಂಡೈ ಇಯೊನ್‌, ಬೋಲೆರೋ, ಮಾರುತಿ ಆಮ್ನಿ ಕಾರುಗಳನ್ನು ಖರೀದಿಸಿದ್ದ. ಈ ದಿಢೀರ್‌ ಶ್ರೀಮಂತಿಕೆ ಹಲವರಿಗೆ ಅನುಮಾನ ಮೂಡಿಸಿತ್ತು.

ಹವಾಲಾ ಜಾಲದ ಶಂಕೆ:
ಉಗ್ರರಿಗೆ ಹಣ, ಹವಾಲಾ ಜಾಲದ ಮೂಲಕ ರವಾನೆಯಾಗುತ್ತಿತ್ತು ಎಂಬ ವಿಚಾರಕ್ಕೆ ಆಯೇಷಾ ಬಾನು ಪ್ರಕರಣ ಪುಷ್ಟಿ ನೀಡಿದೆ. ಆಕೆಯ ಪತಿ ಕೆಲಕಾಲ ಕೊಲ್ಲಿ ರಾಷ್ಟ್ರಗಳಲ್ಲಿ ಕೆಲಸ ಮಾಡಿದ್ದ. ಇಂಡಿಯನ್‌ ಮುಜಾಹಿದೀನ್‌ ಸಂಘಟನೆಯ ರಿಯಾಜ್‌ ಭಟ್ಕಳ್‌ ಹಾಗೂ ಯಾಸಿನ್‌ ಭಟ್ಕಳ್‌ಗೆ ಮಂಗಳೂರಿನಿಂದ ಹವಾಲಾ ಮೂಲಕ ಹಣ ರವಾನೆಯಾಗಿರುವ ಬಗ್ಗೆ ರಾಷ್ಟ್ರೀಯ ತನಿಖಾ ತಂಡ ಈ ಹಿಂದೆ ಮಾಹಿತಿ ಕಲೆ ಹಾಕಿತ್ತು. ಕೆಲವು ಸಮಯದ ಹಿಂದೆ ಅತ್ತಾವರದ ಫ್ಲ್ಯಾಟ್‌ ಒಂದರಲ್ಲಿ ವಾಸವಾಗಿದ್ದ ಇಂಡಿಯನ್‌ ಮುಜಾಹಿದೀನ್‌ ಸಂಘಟನೆಯ ನಾಯಕ ತೆಹಸೀನ್‌ ಅಖ್ತಲ್‌ ಅಲಿಯಾಸ್‌ ಮೋನು ಅವನೊಂದಿಗೂ ಆಯೇಷಾ ಬಾನು ಉಗ್ರರಿಗೆ ಹಣ ರವಾನೆಯ ನಂಟು ಹೊಂದಿರುವ ಸಂದೇಹಗಳು ವ್ಯಕ್ತವಾಗಿವೆ.

ನಮಗೆ ಅನುಮಾನ ಬಂದಿಲ್ಲ:
ಆಕೆಯ ಪತಿ ಯಾರೊಂದಿಗೂ ಮಾತನಾಡುತ್ತಿರಲಿಲ್ಲ. ಆದರೆ, ಆಕೆ ನೆರಮನೆಯವರೊಂದಿಗೆ ಉತ್ತಮ ಸಂಪರ್ಕ ಹೊಂದಿದ್ದಳು. ಯಾವುದೇ ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ನಡೆಸುತ್ತಿರುವ ಬಗ್ಗೆ ಈವರೆಗೂ ಅನುಮಾನವೇ ಬಂದಿಲ್ಲ. ಪತ್ರಿಕೆಗಳು ಹಾಗೂ ಟಿವಿ ಮಾಧ್ಯಮಗಳಲ್ಲಿ ಸುದ್ದಿ ಬಂದಾಗ ಒಂದು ಕ್ಷಣ ನಮಗೆ ನಂಬಲಾಗಲಿಲ್ಲ.
- ಅಸYರ್‌, ನೆರೆಮನೆಯ ವಾಸಿ.