Write Comment     |     E-Mail To a Friend     |     Facebook     |     Twitter     |     Print

ನವದೆಹಲಿ: ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡುಲ್ಕರ್‌ ವಿದಾಯದ ಟೆಸ್ಟ್‌ಗೆ ಕ್ಷಣಗಣನೆ ಆರಂಭಗೊಂಡಿದೆ. 24 ವರ್ಷಗಳ ಸುದೀರ್ಘ‌ ಕಾಲ ಕ್ರಿಕೆಟ್‌ ಪ್ರಿಯರನ್ನು ರಂಜಿಸಿದ ದಾಖಲೆಗಳ ಸರದಾರ ಗುರುವಾರ ತವರಿನಲ್ಲಿ ಆಡಲಿರುವ 200ನೇ ಟೆಸ್ಟ್‌ನಲ್ಲಿ ಕೊನೆಯ ಬಾರಿಗೆ ಮೈದಾನಕ್ಕೆ ಇಳಿಯಲಿದ್ದು, ಕುತೂಹಲದಿಂದ ಕಾಯತೊಡಗಿದ್ದಾರೆ.

ಸಚಿನ್‌ ವಿದಾಯದ ಟೆಸ್ಟ್‌ಗೆ ನವವಧುವಿನಂತೆ ಸಿಂಗಾರಗೊಂಡಿರುವ ವಾಂಖೇಡೆ ಕ್ರೀಡಾಂಗಣ ಸಿದ್ಧಗೊಳ್ಳುತ್ತಿದ್ದು ಸಚಿನ್‌ ಅವರ ಕೊನೆಯ ಆಟವನ್ನು ಕಣ್ತುಂಬಿಕೊಳ್ಳಲು ಸ್ವತಃ ತಾಯಿ ಸೇರಿದಂತೆ ಕೋಟ್ಯಂತರ ಅಭಿಮಾನಿಗಳು ಕಾತರದಿಂದ ಎದುರು ನೋಡುತ್ತಿದ್ದಾರೆ.

ಶತಕಗಳ ಶತಕದ ಸರದಾರ, ಅತಿ ಹೆಚ್ಚು ರನ್‌ಗಳ ಸರದಾರ ಸಚಿನ್‌ ತೆಂಡುಲ್ಕರ್‌ ಇದೀಗ ಸನ್ಮಾನದ ಗುಂಗಿನಿಂದ ಹೊರಬಂದು ಇದೀಗ ಅಂತಿಮ ಟೆಸ್ಟ್‌ ಪಂದ್ಯಕ್ಕೆ ಸಜ್ಜಾಗಬೇಕಾಗಿದೆ. 40 ವರ್ಷದ ಸಚಿನ್‌ ಕೊನೆಯ ಬಾರಿಗೆ ಅಭಿಮಾನಿಗಳನ್ನು ಎಷ್ಟರ ಮಟ್ಟಿಗೆ ರಂಜಿಸುತ್ತಾರೆ ಎಂಬುದು ಕುತೂಹಲ ಮನೆ ಮಾಡಿದೆ.

ಸೋಮವಾರ ಎಂಸಿಎ ಸನ್ಮಾನ ಸ್ವೀಕರಿಸಿ ಮಾತನಾಡಿದ ಸಚಿನ್‌ ಪ್ರತಿಯೊಂದು ಹೆಜ್ಜೆಯೂ ಭಿನ್ನ. ಪ್ರತಿಯೊಂದು ಟೂರ್ನಿಗೂ ಭಿನ್ನ ಸಿದ್ಧತೆ ಅಗತ್ಯ. ಪೂರ್ವ ಸಿದ್ಧತೆ ಇಲ್ಲದಿದ್ದರಿ ಬಿನ್ನ ಸವಾಲು ಎದುರಿಸುವುದು ಅಸಾಧ್ಯ ಎಂದು ಹೇಳಿದ್ದರು.
ಅವರ ಮಾತಿನಂತೆ ನೋಡಿದರೂ ಸಚಿನ್‌ ಈ ಪಂದ್ಯಕ್ಕೆ ವಿಶೇಷ ಸಿದ್ಧತೆ ನಡೆಸಿರುವುದಲ್ಲಿ ಸಂದೇಹವಿಲ್ಲ. ಅದರಲ್ಲೂ ಇದು ಅವರ ವೃತ್ತಿಜೀವನದ ಅಂತಿಮ ಪಂದ್ಯವಾಗಿದ್ದರಿಂದ ಸಹಜವಾಗಿ ಒತ್ತಡ ಎದುರಿಸಲಿದ್ದಾರೆ