Write Comment     |     E-Mail To a Friend     |     Facebook     |     Twitter     |     Print

ಮುಂಬೈ: ಸಂಪೂರ್ಣವಾಗಿ ಮಹಿಳೆಯರೇ ನಡೆಸುವ ದೇಶದ ಮೊದಲ ’ಭಾರತೀಯ ಮಹಿಳಾ ಬ್ಯಾಂಕ್‌’ ಅನ್ನು ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅವರ ಜನ್ಮದಿನವಾದ ಮಂಗಳವಾರ ಪ್ರಧಾನಿ ಮನಮೋಹನ ಸಿಂಗ್‌ ಅವರು ಲೋಕಾರ್ಪಣೆ ಮಾಡಿದರು.

1000 ಕೋಟಿ ರೂ. ಬಂಡವಾಳದೊಂದಿಗೆ ಆರಂಭವಾಗಿರುವ ಈ ಬ್ಯಾಂಕ್‌ ಬೆಂಗಳೂರು, ಮುಂಬೈ ಸೇರಿದಂತೆ 7 ಕಡೆ ಕಾರ್ಯಾರಂಭ ಮಾಡಿದ್ದು, ಎಲ್ಲ ಕೇಂದ್ರಗಳಿಗೂ ಪ್ರಧಾನಿ ಮುಂಬೈನಲ್ಲೇ ಚಾಲನೆ ನೀಡಿದರು. ಯುಪಿಎ ಅಧ್ಯಕ್ಷೆ ಸೋನಿಯಾ ಗಾಂಧಿ, ಯುಪಿಎ ಪಾಲುದಾರ ಪಕ್ಷಗಳ ಮುಖಂಡರೂ ಆಗಿರುವ ಕೇಂದ್ರ ಸಚಿವರಾದ ಶರದ್‌ ಪವಾರ್‌, ಫಾರೂಕ್‌ ಅಬ್ದುಲ್ಲಾ ಹಾಗೂ ಹಣಕಾಸು ಸಚಿವ ಪಿ. ಚಿದಂಬರಂ ಅವರು ಸಮಾರಂಭದಲ್ಲಿ ಉಪಸ್ಥಿತರಿದ್ದರು. ಈ ವೇಳೆ ಪ್ರಥಮ ಖಾತೆದಾರ ಮಹಿಳೆಯರಿಗೆ ಪಾಸ್‌ಬುಕ್‌ ವಿತರಿಸಲಾಯಿತು.

ಮಹಿಳೆಯರ ಸಬಲೀಕರಣ ಉದ್ದೇಶವನ್ನಿಟ್ಟುಕೊಂಡು ಆರಂಭವಾಗಿರುವ ಈ ಬ್ಯಾಂಕ್‌ಗಳ ಶಾಖೆ ಸಂಖ್ಯೆ ಮಾರ್ಚ್‌ ಅಂತ್ಯದ ವೇಳೆಗೆ 25ಕ್ಕೆ ಏರಿಕೆಯಾಗಲಿದೆ. ಈ ಬ್ಯಾಂಕ್‌ ಸ್ಥಾಪನೆ ಕುರಿತು ಕಳೆದ ಫೆಬ್ರವರಿಯಲ್ಲಿ ಹಣಕಾಸು ಸಚಿವ ಪಿ. ಚಿದಂಬರಂ ಅವರು ಘೋಷಣೆ ಮಾಡಿದ್ದರು. ಘೋಷಣೆಯಾದ ಕೇವಲ 9 ತಿಂಗಳಲ್ಲಿ ಈ ಬ್ಯಾಂಕ್‌ ಕಾರ್ಯಾರಂಭ ಮಾಡಿರುವುದು ವಿಶೇಷ.

ಸ್ತ್ರೀಯರಿಗೆ ಎಲ್ಲೆಡೆ ತಾರತಮ್ಯ:
ಮಹಿಳೆಯರು ಹಲವು ಉನ್ನತ ಹುದ್ದೆ ಅಲಂಕರಿಸಿದ್ದರೂ ಮಹಿಳೆಯರು ಮನೆ, ಶಾಲೆ, ಕೆಲಸದ ಸ್ಥಳ ಹಾಗೂ ಸಾರ್ವಜನಿಕ ಪ್ರದೇಶಗಳಲ್ಲಿ ತಾರತಮ್ಯಕ್ಕೆ ಒಳಗಾಗುತ್ತಿದ್ದಾರೆ. ಮಹಿಳೆಯರನ್ನು ಸಬಲೀಕರಣಗೊಳಿಸುವ ನಿಟ್ಟಿನಲ್ಲಿ ಇದೊಂದು ಸಣ್ಣ ಹೆಜ್ಜೆ ಎಂದು ಎಂದು ಬ್ಯಾಂಕ್‌ ಉದ್ಘಾಟನೆ ಬಳಿಕ ಪ್ರಧಾನಿ ತಿಳಿಸಿದರು. ಬ್ಯಾಂಕಿನ ನಿರ್ದೇಶಕ ಮಂಡಳಿಗೆ 8 ಮಹಿಳೆಯರನ್ನು ನೇಮಿಸಲಾಗಿದೆ. ಸಂಪೂರ್ಣ ಮಹಿಳಾ ನಿರ್ದೇಶಕರನ್ನೇ ಹೊಂದಿರುವ ದೇಶದ ಮೊದಲ ಸರ್ಕಾರಿ ಬ್ಯಾಂಕ್‌ ಇದಾಗಿದೆ ಎಂದು ಚಿದಂಬರಂ ಹೇಳಿದರು.