Write Comment     |     E-Mail To a Friend     |     Facebook     |     Twitter     |     Print

ಕನ್ನಡ ಚಿತ್ರರಂಗದಲ್ಲಿ ಎಷ್ಟು ಮಂದಿ ಸಂಗೀತಾ ಇದ್ದಾರೆಂದು ಲೆಕ್ಕ ಹಾಕುತ್ತಾ ಹೋದರೆ ಲೆಕ್ಕ ತಪ್ಪಬಹುದು. ಅಷ್ಟೊಂದು ಮಂದಿ ಇದ್ದಾರೆ. ಕೆಲವರು ಬಂದು ಹೋದರು, ಇನ್ನು ಕೆಲವರು ಸಿಕ್ಕ ಅವಕಾಶದಲ್ಲಿ ನೆಮ್ಮದಿ ಕಾಣುತ್ತಾ ಇದ್ದಾರೆ. ಹೀಗಿರುವಾಗ ಮತ್ತೂಬ್ಬ ಸಂಗೀತಾ ಎಂಟ್ರಿಕೊಟ್ಟಿದ್ದಾರೆ. ಇವರು ಶೆಟ್ರಲ್ಲ, ಭಟ್ರಾ. ಹೌದು, ಸಂಗೀತಾ ಭಟ್‌ ಎಂಬ ಹೊಸ ಮುಖವೊಂದು ಗಾಂಧಿನಗರಕ್ಕೆ ಎಂಟ್ರಿಕೊಟ್ಟಿದೆ.

ಅಂದಹಾಗೆ, ಈ ಸಂಗೀತಾಗೆ ಹಿರಿತೆರೆ ಮಾತ್ರ ಹೊಸದು, ಕಿರುತೆರೆ ಹೊಸದಲ್ಲ. ಹಿಂದೆ ’ಭಾಗ್ಯವಂತರು’ ಎಂಬ ಧಾರಾವಾಹಿಯಲ್ಲಿ ನಟಿಸಿದ ಅನುಭವ ಇದೆ. ಜೊತೆಗೆ ಮಾಡೆಲಿಂಗ್‌ ಅನುಭವವೂ ಇದೆ. ಹೀಗಿರುವಾಗ ಸಂಗೀತಾಗೆ ಸಿಕ್ಕಿದ್ದು ’ಪ್ರೀತಿ ಗೀತಿ ಇತ್ಯಾದಿ’ ಸಿನಿಮಾ. ಇದು ನಿರ್ದೇಶಕ ಪವನ್‌ ಒಡೆಯರ್‌ ನಾಯಕರಾಗಿ ನಟಿಸುತ್ತಿರುವ ಸಿನಿಮಾ. ನಾಯಕಿಯ ಹುಡುಕಾಟದಲ್ಲಿದ್ದಾಗ ಚಿತ್ರತಂಡದ ಕಣ್ಣಿಗೆ ಬಿದ್ದಿದ್ದು ಈ ಸಂಗೀತಾ ಭಟ್‌. ಇನ್ನೇನು ಆ ಸಿನಿಮಾ ಶುರು ಆಗೋಕೆ ಮುಂಚೆನೇ ಈ ಹುಡುಗಿಗೆ ಮತ್ತೂಂದು ಆಫ‌ರ್‌ ಸಿಕ್ಕಿದೆ. ಅದು ’ಮಾಮು ಟೀ ಅಂಗಡಿ’. ಈ ಸಿನಿಮಾದ ಮೂವರು ನಾಯಕಿಯರಲ್ಲಿ ಸಂಗೀತಾ ಭಟ್‌ ಕೂಡಾ ಒಬ್ಬರು. ಈಗಾಗಲೇ ಬಹುತೇಕ ಚಿತ್ರೀಕರಣವಾಗಿರುವ ಈ ಚಿತ್ರದಲ್ಲಿ ಸಂಗೀತಾ, ಸಿಕ್ಕಾಪಟ್ಟೆ ಸಂಪ್ರದಾಯಸ್ಥ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರಂತೆ. ಅಮ್ಮನ ಮಾತಿಗೆ ತಲೆಬಾಗುತ್ತಾ ಹೋಗುವ ಪಾತ್ರವಂತೆ. ಈ ನಡುವೆಯೇ ಸಂಗೀತಾಗೆ ಒಂದಷ್ಟು ಆಫ‌ರ್‌ ಬರುತ್ತಿದೆಯಂತೆ. ಆದರೆ ಕೈಯಲ್ಲಿ ಎರಡು ಸಿನಿಮಾವಿರುವುದರಿಂದ ಅದು ಮುಗಿಯದೇ ಒಪ್ಪಿಕೊಳ್ಳೋದು ಬೇಡವೆಂಬುದು ಭಟ್ರ ಮಾತು.

’ನಾನು ಒಪ್ಪಿಕೊಂಡಿರುವ ಎರಡೂ ಸಿನಿಮಾಗಳಲ್ಲೂ ನನಗೆ ಒಳ್ಳೆಯ ಪಾತ್ರವಿದೆ. ಮುಂದೆಯೂ ಒಳ್ಳೆಯ ಪಾತ್ರಗಳ ಮೂಲಕ ಚಿತ್ರರಂಗದಲ್ಲಿ ಗಟ್ಟಿನೆಲೆಯೂರಬೇಕು’ ಎನ್ನುವ ಸಂಗೀತಾ, ಎಲ್ಲಾ ರೀತಿಯ ಪಾತ್ರಗಳಿಗೂ ಸೈ ಅಂತೆ. ಸದ್ಯ ಪ್ರೀತಿ ಗೀತಿ ಇತ್ಯಾದಿ ಅನ್ನುತ್ತಾ ಮಾಮು ಟೀ ಅಂಗಡಿಯಲ್ಲಿರುವ ಈ ಭಟ್ರ ಹುಡುಗಿ ಮುಂದೆ ಇನ್ನೊಂದಷ್ಟು ಒಳ್ಳೆಯ ಪಾತ್ರಗಳ ತಲಾಶ್‌ನಲ್ಲಿದ್ದಾಳೆ.